Беларускі расследавальніцкі цэнтр намагаўся зрабіць дасяжнай для людзей неабходную інфармацыю, але ўлады гэта забаранілі. Мы накіравалі скаргу ў КПЧ.
Абставіны справы
Беларускі расследавальніцкі цэнтр запатрабаваў у дзяржавы інфармацыю, дасяжнасць якой гарантаваная законам:
Звесткі аб смяротнасці і нараджальнасці за 2020 і 2021 гады – у Нацыянальнага статыстычнага камітэта;
Інфармацыю аб інвестыцыйных дамовах з Беларуссю – у Міністэрстве эканомікі;
Лічбы аб квотах на вытворчасць тытунёвых вырабаў – у Савета Міністраў.
Насамрэч, статыстыка нараджальнасці і смяротнасці ў Беларусі публікавалася штогод да пачатку пандэміі каранавірусу. Інфармацыя аб квотах на вытворчасць тытунёвых вырабаў раней размяшчалася ў адкрытым доступе. Доступ да інфармацыі пра дзейнасць дзяржаўных органаў, да якой адносяцца Інвестыцыйныя дамовы з Дзяржаўнага рэестру, гарантаваны Канстытуцыяй.
Права на доступ да інфармацыі гарантавана Міжнародным пактам аб грамадзянскіх і палітычных правах: як праз медыя, так і праз асабісты доступ да ўрадавай інфармацыі.
У Беларусі гэтае права замацаванае ў артыкуле 34 Канстытуцыі аб "атрыманні [...] поўнай, дакладнай і своечасовай інфармацыі пра дзейнасць дзяржаўных органаў".
Усе запыты БРЦ дзяржаўныя органы Беларусі задаволіць адмовіліся. Спробы абскардзіць адмовы былі адхіленыя.
Нацыянальны статыстычны камітэт адказаў, што дадзеныя пра смяротнасць за 2020 і 2021 "знаходзяцца ў распрацоўцы і будуць апублікаваныя пазней". Інфармацыю за пандэмічныя часы распрацоўваюць да гэтага часу.
Даведка:
Беларускі расследавальніцкі цэнтр – журналісцкая арганізацыя, якая расследуе махінацыі і схемы дзяржаўнай прапаганды. БРЦ ужо доўгі час выкрывае дзеянні ўлады на падставе публічных дакументаў. Але дасяжных дакументаў робіцца ўсё менш!
Скарга ў Камітэт па правах чалавека
Абмежаванне доступу да публічнай інфармацыі аб дзяржаўнай дзейнасці з'яўляецца парушэннем правоў чалавека. Таму мы накіравалі супольную скаргу ў Камітэт па правах чалавека.
Камітэт разглядае скаргу.
____
Наша мэта — намагацца, каб у дэмакратычнай Беларусі інфармацыя была агульнадаступнай для грамадства, а не інструментам маніпуляцыі грамадскай думкай. Рашэнне Камітэта пацвердзіць факт парушэнняў і забеспячыць права да доступу да інфармацыі ў будучыні.